TASTAMENT 2024.

PUČE KUALJSKI DOBAR DAN!

LIPO LI VAS JE VITI OKUPLJENIH I STUARO I MLUADO SVIH ZAJNO NA DOMU. MALO NAS JE AL NAS IMA (SAMO AKO NAS BUDE MALO).
NOVA GODINA JE PASALA, IZBUŠIVALI SMO SE, IZGRLILI, KI JE SRIĆE I VIŠE O TUOGA I OMA SE KRIENULI MAŠKARATI.

JA, MA ČA SU NAN TOLIKO DRUAGE TE MAŠKARE KA SU SVAKE GODINE SVE TO RANIJE?

MA DRUAGE SU MENI MAŠKARE, DRUAGO JE MENI I LOKATI 2 SEDMICE, ALI NI DO TOGA NEGO NAS JE EUROPA STISLA SA ZABRANAMI, A I VALJDA SE JE MLADOST PRESTRAŠILA DA ĆE LJUDI POFRAJATI NO MALO POTICAJA ČA LJUDI DOBIJU PA DA ĆE ZA MAŠKARE DOMA OSTATI.
MA NEGO RECI MI KAKO STE VI PASALI VU GODINU NA RIBAMI, JELI SRIĆE?

A SLUŠAJ O TUOME SE NESMI GOVORITI MI JE GAZDA REKA JER SVE TI OVISI O DVUA UVJETA. PRVI TI JE KAKOVO TE JE VRIME ĆAPALO, A VU GODINU NAS NI POMILOVALO… A DRUGI, EEEEE DRUGI JE TUAJ ZBOG KUOGA MI JE MUČATI, ALI TEBI ĆU PRAVITI. SVE TI OVISI KOLIKO JE DINAMITA NA BRODU I KOLIKO SI ZAMULJUA.

DINAMIT? A IZ DI TI DINAMIT?

A TO BAR NI TIEŠKO VU GODINU U KALI BILO. PUOJDEŠ NAMO GORI, POTPIŠEŠ UGOVOR DA ĆEŠ KOD NJIH PROVIŠTU SVAKI ŠKUR VAZIESTI I U KESI TI SE SVAKI PUT SLUČAJNO KIL, 2, 3, 5.. DINAMITA NUAJDE, OVISI KOLIKO SI POFRAJUA.

MA ČA, I DINAMITA IMAJU? A ČUDA.

VIŠE NE, KAD SE JE PUO GODINE SVUAS BRGAČIELJ TRESA, SVE FUNIESTRE SU POPUCALE, A LJUDI SU SE U GUSTIERNE SAKRIVALI.
91. JE MAKUAR UZBUNA ZNALA BITI A VUODE 3,2,1 PALI NEMA UPOZORIENJA, NEMA PUNO MISLITI.

E TRIESLO SE TRIESLO A GLAVIN SVE TO MANJE. JOŠ DO MALO ĆE BITI GLAVICE. A DISU NI SA TIN PUSTIN MATERIJUALUN? SU KIKOLI BRUAK UMJETNI UČINILI IONAKO RIBE NI?

E DA SE MENE I TEBE ČUA PITALO, NEGO SU NA TO NASULI KRAJ IGRALIŠTA NA LUCI, VALJDA SU VIDILI DA DICA SLABO IGRAJU PA SU IN TILI HLUADA UČINITI. ALI UNDA SU SKUŽILI DA IN JE SKUPO MATERIJUA PLUATITI ZA VE PUSTE RIVE I PLAŽE ČA SU NAUMILI UZIĐATI PA SU SVE TO JOPE PREMESTILI NA MUL I BATALAŽU.

A ČA ĆE SAD DICI HLUAD ČINITI?

MA LAKO TI JE ZA HLUAD...NISU SE SITILI GLUAVU OKRIENUTI PA VITI UČ NO IGRALIŠTE SLIČI. PRVO UMJETNA TRUAVA KUA JE PROPALA PA SU SE RETAJI DILILI LJUDIMI PO SELU, ONO JE I MENI KOMAD U DVUORU. PA SADA TARTAN, VALJDA ĆE I TO ZA KUKOLI GODINU DILITI MORUN TO OMA KAPARATI.

A NEZNUN ČA BI TI REKA...AJME, POGLJE ČA NO GORI LETI?

A TO TI JE MOJA KRV GORI, SA SAN IZ VODOPADA KRV SA VADI, I VALJA PO NOVOME TI TA KRV SA NEKIN DRONUN, HELIHOPTERUN ČA LI TI JUA ZNUN S KUN LETJELICUN GRIEDE OMA NA ANALIZU. E...A SIGURNO SE PITAŠ ZUAČ DRON, ZUAČ TO TRAJEKTUN NE POŠALJU. POJ KUPITI KUARTU U PRIJEKO SVE ĆE TI JASNO BITI, DOBRO IMA DA TI SE TAKULIN ISPUŠE KO ĆEŠ NA TRAJEKT, A AKO ĆEŠ BRODUN UNDA TI U TAKULIN NI NE STANE, MORUAŠ U BUŠTI DONITI.

OKA JUA GOVORIN DA TREBA PRIVATNU LINIJU IZ MULA UVIESTI...KALI LINE...SAMO NEZNUN KI ĆE TO VOZITI, KUOGA ZAPOSLITI?

A IMA IH OVO U OGLASIMI IU NOVINAMI POGLJE VO...DIPENDRA,RAJENDRA, ANJALI SVI TI ONI POSUA IŠĆU

ZA IME ISUSOVO KUA SU TI TO IMENA ČA ČITATI NEZNAŠ?
MA TO SU TI MLUADE NADE POMORSTVA I RIBARSTVA U KALI. IONAKO NAS ZA NA RIBE NEMA PA ĆE I DIPENDRA, ANJALI I RAJENDRA ISTO ZNATI MRIŽU POŠTIVATI I U KAIĆ SE UKRCATI...A VALJDA NAS UNDA MORU I DOGRADA VOZITI.

A ČA JE VUODE IZA NUAS JESU SE DOGOVORILI VIŠE?

AJME AJME TO TI JE ŠTUORIJA ZUASE POŠLI SU GA SMAKNUTI NAKRAJU IH JE JOŠ VIŠE N***, ALI AKO NIŠTA MAKUAR SU NAN CRVENDAĆI NA RAČUN TUOGA PUTI U INTRUADI NAČINILI, ISPIEKLI KUKOLI KOBASICU, SLIKALI SE I PUDOME UVIK SE MORE NEŠTO DOBRO IZ P*** IZVUĆI.

ALI VALJDA SE NEKO TOLIKO ZAMIRI PA SU VUOME NAŠEMU AFTER MAJSTORU POŠLI AUTO UŽGATI ISPRI KUĆE ALI SU UŽGALI KRIVO AUTO.

MA KI SAD AFTER MAJSTOR?

EEE MORUA DA NE IZLAZIŠ VUNKA KAD TO NEZNAŠ MLADOST JE POLICIJA PRETISLA PA IN MUZIKU RANO GASU I UNDA TI NASTUPA NUAŠ UKULELE AFTER MAJSTOR ZNUAŠ KAKO SE NO REČIE DO RANIH JUTARNJIH SATI.

A SVAŠTA U VIN SELU IMAŠ ZA ČUTI, MA NEGO KI JE TO AUTO NAKRAJU UGASI?

A KI ĆE GA UGASITI VELIKI DIREKTOR SVIH KUALJSKIH PODUZIEĆOV U SURADNJI SA OVIN NAŠIN DOTIČNIN ISPRI NUAS?

MA KI JE VUAJ MLADIĆ SRUM ME JE PITATI GA A ČUDNO ME GLJEDA UČ LIČI SVUAS JE PIJUN I DROGIRUN GUOSPE MOJA.

EA VUAJ TI JE ZA SVE KRIV UN TI JE KRIV ČA SMO MI SA OVO, ČA MAŠKAR IMA, ČA JE STREETBALLA, ČA JE DEFILEA ZA MLADOST KO NEKAD, ČA JE KONCERTOV ZA BLUAGDANI, ČA INOVACIJE U KALI DOVODU ZA NAŠU DICU I MLUADIH, I ČA SU ZA MLADOST PROSTOR UČINILI DA PO KAFIĆIMI NE VISU SAMO, SAMO NA ŠUOLDI MISLI VIŠ DA MU JE PUNA PRIKOLICA A I VAJK JE PIJUN I DROGIRUN....TAKO SU MENI REKLI....A I VITI JE TAKUOV....
MA KI STREETBALL ČA JE BILO TO VU GODINU?

E STREETBALL TI JE BI, SAMO TI NISI IMUA DI PROČITATI, JER VALJDA U VIMI NAŠIMI NOVINAMI NEMOREŠ VITI NEGO KA NEKA MUAŠKA NESTANE ILI KAD VODIE NI U SELU.

AJME TA REDUKCIJA VODIE ME S***. DUOJDIN IZ RIB OĆU SE BLJIHNUTI
PRIJE NEGO POČININ A NO VODIE NI PA SVE NAKO SA STRGOTINUN LEĆI IDIN I SVUAS SE MARINIRUN I UNDA ALA JOPE NA RIBE I TAKO U KRUG DOK NE POGODIN KA OTVORU ŠPINU.

EA VODIE, NEGO I STRUJIE NEBI BIILO...VALJDA SU SE NA VODOVOD UGLJEDALI KAKO IN TO PROLAZI PA SU ODLUČILI DA SVAKI TREĆI DAN NE BUDE STRUJIE U ODRIEĐENIN PODRUČJU SELA JEDAN DAN POGUASU MUL I BRGAČIELJ, DRUGI DAN BATALAŽU I DOM, TREĆI DAN SVE KOLO CRIKVE, A OD VLUAKIE PUDOLI DO LONG BEACHA SU SKUŽILI DA IONAKO NEMA SMISLA DA IH JE MALO PA DA SE NEMA KI ŽALITI PA SU TO ZA VAJK POGASILI.

A DEFILE ČA JE I TOGA BILO?

BILO BILO, ALI TO TI JE BILA POSEBNA BARUFA MALO MESTA A SVI BI MUHTO LOKALI PA KAKO SE KI NI USPI UKRCATI TAKO BI VUOME OVO SVAŠTA GRUBO IZGOVORILI JOŠ JE PREKO VEZE NA PRIVATNIMI PORTIĆIMI KRCUA A KAKO NIEĆE MORUA JE AFTER MAJSTOR BITI OTO A ZASPA JE KI BI POSLI TAMBURUA DOJUTRA?

A JUA SAN TI BI NA BRUDETIMI VU GODINU NA MULU NUAJBOLJEGA SMO PARIĆALI GARANTIRUN TI TO ALI UVIK ISTA PRIČA, UVIK ISTI DOBIJU VALJDA NAJVIŠE VINA DONESU JER TO TI JE GLUAVNO GORIVO ZA VUAJ NUAŠ DUGOGODIŠNJI STRUČNI ŽIRI…STRUČNI ŽIRI DOGODINE JUA NOSIN PUN ROSVAJ OD 350 LITAR PA JE TITULA NAŠA.

A GLJE TI VUAJ DOM UČ SLIČI UŽUA JE POMETIN BITI, SJAJITI SE KO I CIJELO SELO KAKO SU VO ZAPUŠTILI?
A JEDINA KUA JE S MIETLUN ZNALA BARATATI TA TI JE U PENZIJU POŠLA...POBIGLA JE GLUAVUN BEZ OZBIRA.

EA TA ISTA FIRMA TI JE VO LETO BILA ZADUŽENA DA PLAŽE OVE UČINJENE OD GLAVIN I ONE STUARE OPRIEMI PA SE DOGODILA DEŽGRUACIJA KOD POSTUAVLJANJA JEDNIE KABINE ZA PRESVUČIVANJE?

A NI SE VALJDA NEKOME NEŠTO DOGODILO? DA NI NA NOGA NAŠEGA LIPOGA DIREKTORA PALA?

NI NI SAMO JE NA BATALAŽI PIVE NESTALO TOKUN POSTUAVLJANJA, JE*** VRUĆE JE VALJUA SE I ODRŽATI NA ŽIVOTU KA TAKO JE*** POSUA RUADIŠ...DOŠA SAN PIVU POPITI I OKUPATI SE, MA JIE, NI JEDNO NI DRUGO...NITI SA SE OKUPUA JER SE NIS IMUA DI PRESVUĆI, NITI BI SE IMUA DI POSLI OPRATI JER TUŠOV NI BILO, NITI SAN PIVU POPI JER SU BUAČVE OSEKALE, A BOGAMI NIS SE MOGA NI IZVUALITI ZATUFINJITI POD TAMARIŠI KAD I NJIH NI BILO.
MA ČA SA TAMARIŠOV NI BILO, NISU VALJDA PROPALI, ČA SE TO DOGODILO? MA VRAGA SU PROPALI, POPILALI SU IH....POPILALI I TO U KORJENU DO JEDNOGA MOGUĆE DA TO IMA VEZE S ONIMI OSEKUANIMI BUAČVAMI, ALI NIS SIGURAN..

A ONUAJ JAPANAC U LAMJANI ČA JE S NJIN JESMO GA SE LIBERALI VIŠE LAKO JE MENI ZA TUNJEVINU NEGO NIS U SRDELE PO OBIČAJU PRIJE RIB MOGA NI PIVU POPITI...A KAKO SI I ČU NIS NI NA DRUGU BANDU MOGA U BATALAŽI
TIEŠKI DISASTER...

A TUAJ NIŠKORIST SE JE VRNU NA NUAJ ŠKUOLJ IZ KOGA JE I DOŠA A NA TRON TI JE ZASIE MALTEŽANIN. LJUDI ČA SU U FIRMI SU DONEKLE ZADOVOLJNI, A JUA NISAN JER JOPE JE TA SRDELA SNACK ZATVORENA I JOPE JUA NEMUOGU U SVUOJ DIGOGODIŠNJI RITUAL ZUATO I NE LOVIMO.

MA ČA ZATVORENA TEK SAD ĆE PROCVITATI, SA TI JE TAMO ZASELO KUALJSKO SVIETO TROJSTVO BIZNISA SAMO ĆE SE LOKATI I ŽDERATI SE GOVORI, ALI JOPE ĆE I ONI NEŠTO KRIVI BITI ZNUAŠ KAKO TO KOD NUAS GRIEDE U SELU....SAMO SU TI MLUADI ZA SVE KRIVI...KI IDE ČUA NOVOGA I DOBRUOGA UČINITI OMA JE KRIV I IMA DA ZUATO GORI DANUAS U IME SVE PERSPEKTIVNE MLADOSTI U KALIMI.

DOBRA VEČER, NA DOBRO VAN DOŠLA PRVA BADNJA VEČER, PA SUTRA POROĐIENJE GOSPODINOVO. PA STIPANJA, PA IVA......

MA ČA SI TO SA POČA RECITIRATI BADNJIDUN JE PASUA IMA MISEC DAN DA NISI I TI URIEĐIN KO VUAJ DOTIČNI.

NI NI POBRATINE NEGO DA VU DICU PODSITIMO KAKO JE TO NEKAD BILO NE DUAVNO ČAK I PRIJE PUAR GODIN. UŽALO SE JE HODITI PO SELU, KADITI, PIVATI, DRUŽITI NEMA TOGA VIŠE, SVE MANJE I MANJE. NEMA VIŠE KADINJKOV, TAMJANA, SMIHA DICIE PO SELU. ŽALOSNO DICO NE DAJTE DA NAN ZUANJI OBIČAJU PROPADU, KADINJAK URUKE VU GODINU 😊

AJME PUNO SMO SE ZAPRIČALI MORUN DOMA ALI MORUN KROZ DOM PASATI NA RIBARNICU STATI UZIETI ČAKOLI ZA OBIED.

MA KU RIBARNICU NA DOMU SA TI SE NAVODNO RIBA PRODUAJE DOLI KRAJ GOVNJAR… OVIE, BATALAŽE U NEKOJ KOPUNIERICI, TOBOŽE „KIOSKU“ KAKO SU GA NAZVALI, KRAJ ONIH PUSTIH GOVUN PA DA MORU I STUARU RIBU UVUALITI ČA SMRDI PA SE IZVUĆI NA GUOVNA MADA IN NI TUAJ PLAN NI BAŠ USPI JER JE NUAŠ VELIKI DIREKTOR USPI TO RIŠITI PA VIŠE NE SMRDI DA NE BUDE DA SAMO TRAČAMO I GRUBO GOVORIMO.

ALI SVEJEDNO BI JUA VOGA MLADIĆA ČA ME KRIVO GLJEDA OSUDI MA NEMUOGU GA VIŠE GLJEDATI DVUA DANA SE VUODE PO SELU ŠIEĆE, A GRUB LI JE MAJKO MOJA MILA A OD KA JE DOŠA SAMO SE BANČI I LOČE PO CIJELI DANI. MOŽDA KO GA UŽGEMO VA LUDNICA U SELU MALO I MAJINUA.

PUČE KUALJSKI JELI KRIV?

KRIV JE ČA MINE PUCAJU U BRGAČELJU KRIV JE ČA SE RIBA I GUOVNA MIŠAJU
KRIV JE ČA MLADOST IMA VEĆINU U VIJEĆU KRIV JE ČA SU KUARTE POSKUPILE
KRIV JE ČA UVIK ISTI DOBIVAJU NA BRUDETU KRIV JE ČA NEMA VODIE I STRUJE U SELU
KRIV JE ČA JE PIVE NESTALO KRIV JE ČA NEMA RIBAROV
KRIV JE ČA SU SVI LJUTI NA OMLADINU RADI NJEGA KRIV JE ČA SU AFTER MAJSTORU POŠLI AUTO UŽGATI KRIV JE ČA JE MOJA KRV DRONUN UGRAD POŠLA
KRIV JE ČA IMA STRETBALLA
KRIV JE ČA MLADOST ODRŽIVA TURIZAM I TRADICIJU U SELU KRIV JE ČA DUAJE KUALJANIMI SADRŽAJA ZA ZABAVITI SE
KRIV JE ČA DEFILE POKUŠIVAJU VRNUTI KRIV JE ČA JE NAČELNIK MLUAD
KRIV JE ČA JE OMLADINI NIKAD BOLJE U SELU
I KRIV JE ZA SVO ZLO U VIN SELU PROTEKLIH GODIN! NAŠI LJUDI DOBRE VOLJE DO GODINE BIĆE BOLJE!!!!! NAŽGI GAAAAAA!!!!!