Kualjska dica su na Bratskom dvoru u Kalima u četvrtak, 8. kolovoza predstavila svoje pjesme, priče i druge radove nastale u okviru projekta "Kualjska besida".

Bio je to literarni natječaj u kojem su sa  ukupno 22 svoja uratka sudjelovali učenici osnovne škole od 1. do 8. razreda.

Naši školarci pisali su svoje literarne uratke na kualjskomu govoru, koji su tiskani i u prigodnoj, grafički dizajniranoj brošuri s ilustracijama u boji u nakladi dobrotvorne udruge „Sv. Pelegrin“ Kali. Projekt je vodila profesorica Linda Kolega Babajko, a glavni događaj upravo je bila dječja pjesnička večer i smotra dječjih radova na otvorenom prostoru Bratskog dvora. Organizirani večernji program vodile učenice Gabriela Franov i Mia Kurtin koja je otvorila Kualjsku besidu recitacijom pjesme dr. Slavka Perovića Lipi nuaš jazik.

Učenici koji su sudjelovali u natječaju pročitali su svoj rad, a to su bili: Luka Zelenčić, Manuela Čović, Tonko Mišlov, Nikola Kolega, Aurora Halilović, Kiara Vitlov, Vito Kolega, Mia Kurtin, Nino Vidov, Toni Vitlov, Berta Školjarev Zara Gobin, Josip Vitlov, Matej Šokić, Alisa Grzunov, Nora Vidov, Nina Srnzetić, Mareta Bubnjić i Vito Valčić.

Najbolji literani radovi prema ocjeni i bodovima višečlanog povjerenstva Beside nagrađeni su u završnom dijelu večernjeg programa.

Tri najbolja ujedno i nagrađena rada su: Kiara Vitlov za pjesmu „Ribar“, Nina Srnzetić za pjesmu „Muoj did“ i Berta Školjarev za pjesmu „Muore“.      

Među 22 odlična literarna rada posebno su pohvaljeni: Mia Kurtin za pjesmu „Jugo“, Luka Zelenčić za pjesmu „Naše lipo mesto“ i Nikola Kurtin za pjesmu „Tun“. 

Svi sudionici dobili su pohvalnice za svoje sudjelovanje u ovom vrijednom projektu očuvanja kaljske kulturne baštine i identiteta.

Recitacijama pjesama domaćih kualjskih pjesnika predstavila se još učenica prvog razreda Dženi Kurtin koja je kazivala pjesmu Milene Rakvin Mišlov „Ni lako vela biti“ te učenici 3. razreda, predvođeni učiteljicom Ines Kolega. Kazivali su pjesme "Tusni berekin" dr. Slavka Perovića i "Faljen Isus", Milene Rakvin Mišlov.

Nastupila je i predškolska skupina dječjeg vrtića “Srdelica”koja je otpjevala pjesme "Šinjorina"i „Moja Ane broji dane“, a u glazbenom dijelu večernjeg programa predstavila se otočna dječja klapa Baliniera koju vodi profesorica Nada Smoljan, a nastupili su s pjesmama „Mare moja, moj uzorje“ i "Šijavica". Publiku je svojim nastupom razveselila i plesna skupina igraonice Cinci Linci koju vodi voditeljica Nina Ivanov.

Ribar

Na moru friška bura metie,
stuari ribar mrižu pletie.

Ruke nagrišpane, juake,
žvielto prebiru mriže, zamršene, pruazne.

Sunce zapada na zmuorcu,
brižan ribar štivua uorcu.

Ni bura, ni jugo ne moru ga smiesti,
vuažno je mrižu vižitati i ispliesti.

Kiara Vitlov, 8. a razred

Muoj did

Muoj did je ko muali poča
na ribe hoditi i doma
šuoldi nositi.

Roba mu je uvik po
ribi smrdila, a baba se nunj uvik ljutila,
a un bi joj reka da joj
šuoldi ne smrdu!

Muoj did je uvik i mrižu
i paranguali hita,
a i na tunju je loviti znua.
I tako mu je prolazi živuot.
A i na muasline je
voli hoditi i jua
bi s njin neki put pošla.

Jednuoga dana did
mi je u intruadi pua
i sad samo na
taraci sidi
jer ga je struah di puojti,
i samo gljeda ka ćemo mi svi
doma duojti.

Nina Srzentić, 6. r.

Muore

Pluavi se i sjaji na suncu.

Sunča se.
Ne vidin mu kraja.
Ni mu lako, pečie ga.
Sve neke crte po njin ko strgotine na srdeli.
A dica skuaču.
Is maretami se igraju.
Brodi ulazu.
Čičci čiču.
Kaminja se miču.
Ne znun jesu li ribe ili kaminja,
samo znun da je vo lipota
kua živuot minja.

Berta Školjarev, 7.a 

Jugo

Puše, daži, grmi, lampua,
Jugo tučie, muore prska.
Nider nikoga, samo un i ona
ispod stuare boloture,
zagrljeni.

Mia Kurtin, 7.a

Naše lipo mesto

U Kalimi se svi znuadu
niki truažu pruavdu,
a niki dilu intruadu.

Ka' je štajun o' fiešte
nosu se nove vešte

i kalamin šietaju divuojke furešte.

Sviega ko nuas ima,
ali vavik vridi ona stuara:
„Duojdi u Kale ka' je Tunuara!“

Luka Zelenčić, 6.a

Tun 

Tun je riba plava,
kua svakomu kruha je duala, 
ni je lako ćapati, 
tribe je nuajprije nuajti.
 
Čin vidiš kaleba,
i tun se pojuavi,
to je vesielje veliko
ka tuac se doma juavi.

Tun ni samo riba
više je od hruanie,
tun je ko srdela
riba bez muanie.

Nikola Kolega, 8.a 

Na Badnju večer

Na Badnju veče se u mojin selu dica spriemaju puojti kaditi. Ovie godine san izgubila kadinjak od luani pa san materi iz frižidiera uzela kušiervu, oprala vuaž i za čas načinila ganjc novi kadinjak. Sad je još trebalo čekati prijateljice da krienemo. Po putu dica griedu sve u grupicami, a iz kuć se čuja pisma:,,Dobra veče, na dobro van došla prva Badnja večer pa Stipanja, pa Ivanja, pa mladinci pa mluado leto. U polju van rodila šenica, a u kući malena dičica. Otvarajte škabelini podilite baškotini, otvarajte ormarići podilite marunići, otvarajte škrinjetine podilite smokvetine.“ U meni vesielje ,a srce mi kuca ko da će izletiti. I za kruaj ostane ono nuajbolje, diliti slatkiši sa mojimi prijateljicami.

Nora Vidov, 6.b

Abak

„Nauči abak!“ vikala bi mi mati.
„Oću mamo!“ a hodila bi se na barbike i bebe igrati.
Posli uru bi se vrnula:
„Ajme mamo, jua vo ne bi učila!“
Pritila bi mi da ću tučena biti,
pa bi se morala plačući u sobu vrnuti.

Alisa Grzunov, 6.a

Kuale

Kuale,
muasline se zelenu
pogljedaj vu milinu.

Kuale,
brodi na muoru
dica na dvuoru.

Kuale,
di ćeš bolje nuajti u životu,
zuato i jesmo nuajbolji na svitu.

Luka Zelenčić, 6.a

Bicikla

Moju prvu biciklu
dobi san još ko muali.
Ka' bi me mati u njuoj karocala,
svi bi moji dvorani znali.

Svaki dun smo u šietnju hodili i u njiezinoj
prikolici provištu doma nosili.

Voli san jua tu svoju
biciklu, ali godine su pasale i na
ried su druge bicikle došle.

I dun duanašanji,
sedin na svoju biciklu
i volin na njuoj svuder puojti,
ali jedva čekun
kad ću doma duojti.

Moja bicikla i jua
smo ko nuajbolja prijatelja
dvua.

Matej Šokić, 8.a

Kualjani

Volu ribu loviti,
u uljarici mliti,
pićie u Mavre popiti

Volu sunce na muaslinamin viti,
a unda u kuću siesti,
ribu pojisti.

Kualjani volu maškare proslaviti,
na Batalaži se kupati,
starosti pomoći,
do Otrića puojti.

Kualjani se u crikvi volu moliti.
i na Mulu se družiti.

Manuela Čović, 7.b

Srdela

Bilo vela,
bilo muala,
bilo fiška
ili sluana.
Vajk je dobra bila
i za težuaka
ko i gospoduara.

Prije se lovila
kako se je tila,
a sada nan Unija kvotu bira.

Ali neka znua cieli svit
srdela će naša hruana
biti zauvik.

Aurora Halilović, 8.a

Ka će leto

Ka će više škuola fermati
da muogu noge u moru toćati.
Dosta mi je više knjig i domaćega rada
i ovih pustih ispitivanja sada.

Mati me tira učiti i pisati,
a jua samo gljedun kako ću se igrati.
Cielu godinu se mučin i učin
pa se na kraju i is bratun potučin.

Do puodne ću svaki dan spati
dok me ne izbudi mati.
Ovo leto ću samo uživati
i s prijateljimi se cijeli dan kupati.

Josip Vitlov, 6.b

Kualjske vile

Posestrine, vile kualjske,
opasuane kolo struka kurdelun.

Sestro, ajmo da nan se pisme oru,
namo na rivi druagoga nan mesta
tamo nan je lipo zapivati. 

Raširimo fuštuani,
a ispo fuštuana krila obucimo,
neka se vidi kako u kolu letimo
ko kualjske vile.

Zara Gobin, 8.a

Sunce

Zluatno sunce u puodne nuajjače sije
i svojun teplinun svih grije.

Samo ne volin ka je vruće
jer se unda morun sakrivati u hluadu kolo kuće.
Mati mi viče: “Di ti je kapa?”
A jua ne znun ni di mi je šlapa.

Isto više volin ka je sunce,
nego ka daži
jer unda cieli svit u kuće biži.

Toni Vitlov, 3.razred

Muoj Škuolj

Dodolo i Neno sidu na rivi u kafiću
treba pluatiti, broju siću.

Izdaleka vidin Fiću,
kupati se na Feral poša,
a za deset minuti i trajekt je doša.

Došli su turisti, krcato je svita.
Barba Ive samo euri pita.

Barba Lučo skosa iz nove rive,
a ciela južna punta miriše na smilje.

Vito Valčić, 7. a

Leto

Sunce prži, pečie,
Muore ko špeć,
bistro, lipo.
Marete tuču u škalju.
Cvrčci čiču,
raci se miču.
Sparina.
Leto je.

Mia Kurtin, 7.a

Popuodne u Kalimin

Dica na domu košarku igraju,
Miki na Bratskin dvuoru sidi i pripovida.

Oko restorana bageri mažinaju,
penzionieri u Bubala uživaju.

Ka' su brodi viezani za rivu,
dica skuaču s pruove u dubinu.

Nino Vidov, 7.a

Maškare

Svi znuadu da se Kualjani volu maškarati
i nosu maske svi,
ni bitno 'oće li nagradu dobiti
sve dok će se dobro zabaviti.

U maškare se griede
kad je juako zima.
Svako kualjsko društvo
svoju masku ima.

Veseli se unda
i stuaro i mluado,
brige i jadi ne postoju,
cielo selo živi
ko bubrig u loju.

Sve ča je grubo
nestane s krnevualun,
unda jopet nanovo
sve po stuarin.

Vito Kolega, 7.b

Glavine

Iz njih se sve vidi,
na njimi se kiša iz borov cidi.
Nema in kraja,
a pune su nekoga lipoga sjaja.
Puti i putići
danuaska su zariesli,
čuvajmo ih, ljudi,
Kualjani su is njimin riesli.

Mia Kurtin, 7.a

Kuale

Kuale je mladosti puno,
a na mladost se svi ljutu.
Isto se svi juavu na putu.

Kuale je sada puno svita,
više nego za vrime Tita.

Na Badnjak gremo kaditi,
a posli tuoga kumpiri saditi.

Volin svoje mesto Kuale
i voliti ću ga dok san živ,
ovo' riestin, ovo' san sretan
ovo je muoj mir.

Tonko Mišlov, 7.b

Čigova si ti?

Kualjske ćakuluone na putu ćakulaju. Čin me vidu, jua pozdravin; „Dobar dan, ča je!“ 

„Ni čaja ni kafie“, liešto reču. Unda pitaju, „Čigova si ti?“ Jua provun reći, ali one me i ne slušaju. Ko da pitaju jer moraju, a ne jer ih zanima. Tako van je to u Kalimi.

Mareta Bubnjić, 6.a