PUČE KUALJSKI, DOBAR DAN!

LIPO LI VAS JE VITI OKUPLJENIH I STUARO I MLUADO SVIH ZAJNO NA DOMU.
SA ĆEMO OSUDITI VOGA DOBRO POZNATOGA NEZAVISNOGA KRNEVUALA, AKO TO KI UOPĆE VIŠE I SLUŠA.

MA KAKO TO MISLIŠ, ČA VO UNDA UOPĆE I PIŠEMO I VA IONAKO JADNA ISPAĆENA GRLA TROŠIMO?

A SVAKE GODINE SVE TO GORE, NITI NAS KI SLUŠA NITI JE KUOGA BRIGE, A TROKE DA BI SE NASMIJALI, VRAG ODNI I MOBITELI.

KA JE SRATI PO VIN NAŠIN KRNEVUALU SVI SU GLUAVNI, E A SA KA GA SE JE ĆAPALO I DOVELO PRED OSUDU SA NI ČUTI NIEĆE.

NEMA VEZE MOĆA MI VO ISTO PROČITATI PA ČA BUDE BUDE. MA RECI TI MENI ČA JE VUAJ UČINI KA SU GA OSUDITI DOVELI.
MISLIŠ REĆI ČA NI UČINI OVO ZUANJIH 4-5 GODIN. NEGO RECI TI MENI DISI TI ZUANJA DVUA DANA MAŠKAR NEMA TE NI NA POVORCI NI U DOMU?

A PUŠTI ME ČOVIČE U PIETUAK U 11 URI SA IZ ARTINE KRIENU PU DOMA, KROZ BATALAŽU PASATI NIS SMI JER JE JEDNOSMJERNA PA SA POŠA KROZ DUOLUAC I TAMO NI MANJE NI VIŠE NEGO MLADEN GRDOVIĆ S AUTUN U BELEMATINA
VRTLU, MAJKA MACA, A PANDURI ZATVORILI DUOLUAC. I JUA ČA ĆU, NUASE
KROZ CRIKVU DA ĆU PUDOLI, A NO OGRADA I BETONARE NALIVAJU TARACU O HOTELA.

KUDER SI UNDA PROŠA JADAN NEBI?

NIŠĆE JUA U PREKRŠAJ PA KROZ DUOLUAC PUDOLI I DA ĆU UZMORE KROZ PRIJEKO KA NO DRUGI PANDURI KO DRVORADA, I TAMO JE JEDNOSMJERNA A NISA ZNUA PA SA PLUATI GLOBU I NIŠĆE JUA NUASE PU DUOCA, ČEKATI DA
GGRDOVIĆA DIGNU KA NO NA JEDAN PUT I DRUGO AUTO KO BELEMATINA U VRTLU. I NIŠĆE JUA RUČNU GORI I TEČUĆI PU DOMA.

AJDE, AJDE, DOBRO SI I NA VO PRISPI ČA TE JE SVE ĆAPALO.

A ČAJE KAKO TI JE VO LETO PROŠLO JESI SE ČUA IZOPIJUA, IZTULUMUA NA VIMI NAŠIMI FIEŠTAMI.

MA VRAGA I TUOTE SA POPUŠI. DOŠA SA NA MUL MUZIKU NI ČUTI, RAZGLAS NIKAKOV, JAČE SE JE IZ POLJANE MUZIKA ČULA NEGO IZ SREDNJE RIVE, A ZA DEFILE NIS DOBI POZIVNICU, A NA BRUOD DI JE MLADOST BILA NISA PRISPI JER JE UN JEDINI NA KUOGA SE BEZ POZIVNICE MOGLO PUOJTI.

MA KU POZIVNICU ZA DEFILE? OD KA ZUASE ZNUN SA NA DEFILEU MUHTO, NEBI DA NA PIR GRIN?

E MUOJ PRIJATELJU VO LETO SU TI SE NA BRODI KRCALI SAMO POSLOVNI PARTNERI, TO KUALJANA NI TRADICIJE VIDILO NI, MOGLI SMO SAMO IZ BATALAŽE GLJEDATI I PLAKATI.

E AJME ČU SA TO NEŠTO… A I DA JE MALO MEŠTRUA ZAPUHUA PA IN JE VALJDA NU LAGAHNU ROBU OD MRIŽ POČALO DIZATI PA SU IH OMA NUASE VRNULI U BATALAŽU.

MA KU ROBU OD MRIŽ, ČA I TOGA IMA?

E JEDAN NUAŠ PAMETAN ČOVIK JE SKUŽI DA NI ČUA VIŠE OD VOGA RIBARSTVA, PA JE OD MRIŽ ROBU POČA KROJITI I U SVIT PRODUAVATI, A NI TI NEGO VAGUN ČISTIH KO RIŽI ĆAPATI ZA JENU JAKETU KUPITI.

E A NI NI UN LUD I JUA SAN SE ISKRCUA ĆA IZ TIH RIB, SVE JE KVRAGU POŠLO, NEMA MUĆUONOV, NEMA SRDIE, SVE JE TUNJEVINA KVRAGU DUALA, A NA TUNUARU NAN NE DUADU PUOJTI.

E A PUAR BRODI SA ČU DA SE JE SKUPILO ZA NA MUALTU DA ĆE PUOJTI TUNJEVINU LOVITI, A MENI SE ČINI DA GRIEDU OD ŽENIE POBIGNUTI I TULUMATI NA MUALTI.
A ČA ĆEŠ UNDA, DI ĆEŠ SE SA ZAPOSLITI?

A NEZNUN NEKI ČA SU POBIGLI KO JUA OTVARAJU KAFIĆI, NEKI SU POBIGLI NAFTU BUŽATI A NEKI SA ČU DA TUNELI BUŽAJU U DANSKOJ.

A ČA SE NE ZAPOSLIŠ U VIN NAŠIN DOMUAĆIN PODUZIEĆU, ČU SA DA SE ŠIRU, DA SVAŠTA NOVOGA IMAJU TE KAMIONI TE NOVI KOMBIJI TE NOVE MANIGE A ČU SA DA SU I USISAVUAČ ZA SELO KUPILI PA DA GA NEMA KI VOZITI, A POGLJE UČ NA SELO SLIČI.

MA JUAVI SA SE JUA ZA VOZITI TUAJ USISAVUAČ PO SELU, ALI KURAC PA DA JUA MIESTI ZA NJIN POSLI MORUN?

A ČA ĆEŠ MIESTI ZA NJIN GANC NOVI JE PA SVE ĆE UN TO POSISATI I OPRATI SUN TEBI JE SAMO PUO LITRE U HLUADU DRŽATI I NOGE UZRAK DIGNUTI.

MA VRAGA ČU SA DA SU GA 300 HILJAD EURI PLUATILI, A UN DA NEMORE NI 20 EURI IZ TLOHA POKUPITI, VALJDA JE I UN VIDI DI JE DOŠA PA JE I UN RUKE OD
SELA DIGA.

A UNDA SI SE MOGA ZA U DVD JUAVITI VIŠ DA MUHTO TEČAJ DUAJU, VO LETO NA JE UZGAJALIŠTE IZGORILO A DEŽURNI VATROGASCI SU NA PO BAROVIMI LOKALI.

MA NEZNUN ČA BI SVE SE MISLIN BILI POČA KRUASTI PO SELU KO I OVI NAŠI PRIDOŠLICE.

A ČA SE TO I KRUASTI PO SELU POČALO.

VO LETO SU TI DVUA BARA STRUADALI JEDAN DO DRUGOGA DOLI U LAMJANI, PONILI SU IN ALKOHOL I ŠUOLDI IZ KASE, GOVORI SE DA SU TO NEKA DICA OPERIRALA, MI KA SMO BILI MUALI SMO ĆIKULUADICE PO DUĆANIMI KRUALI, A DANUŠNJA DICA KA VIDU ČA IH ČEKA VEĆ SU I LOKATI POČALA.
E A ČU SA DA JE I JEDAN DVOJAC PRE OZBILJNO SHVATI BOJKOT DUĆANOV I VALJDA SU OSTALI BEZ CIGARETOV PA SU UPALI U DUĆAN OVO DOLI ISPO NUAS I POKUPILI SVAK 10 ŠTIEK CIGARETOV
E A ČU SA TO VALJDA DA SU SE TOLIKO CIGARETOV NAKILILI DA SU IN OČI GLUADNE BILE PA DA NISU IMALI DI SIKIRU STAVITI PA SU SE KAŠNJE PO NJU
VRAĆALI ALI NISU RAČUNALI DA SU NAN PANDURI KO NINDŽE POČALI PO SELU HODITI PA SU DOŠLI PRIJE NJIH.

SA KA VEĆ PANDURI SPOMINJEŠ... SI ČU TI DA SU I PO KUĆAMI POČALI
LJEKOVITO BILJE KUPITI, SVE SU NA PONILI, NEMA NIJANCI VIŠE NI ZA POMOĆI SE.

E A VA NAŠA OPĆINA I VUAJ LIPOTAN JE NAŠIMI VRTLARIMI PROBI JOŠ JEDAN POŽARNO-EVAKUACIJSKI PUT IZ GLAVIN, ZNUAČI DUPLA FUNKCIJA, EM DA NAN POLJA NEDAJ BOŽE NE IZGORU ULETU KA NAN VATROGASCI IONAKO SAMO
SPU I LOČU A I USPUT DA SE IMA KAKO POBIGNUTI KO PANDURI NALETU JER VALJDA DA PUT NI NITI UCRTUN NA MAPE.

NEMA PRUAVI SMO KALI-KARTEL, UVIK SMO IMALI SMISLA ZA BIZNIS.

A SI VIDI BIZNISA PRUAVOGA DOLI U LAMJANI, NOVI HANGAR SU OTVORILI DA NA RIBARI KRPATI MORU U ZIMI.

JIE SAMO ČA NAS IONAKO SMUATRAJU ZA STOKU KO NE I GORE PA SU MISTO PRUAVOGA HANGARA NARUČILI HANGAR ZA STOKU PO SLAVUONIJI DRŽATI, SVUAS JE NA BUŽE PROPUH JE NA SVE STRUANE PA PUO SELA UKUOČENO GUOBAVO PO SELU GRIEDU, NE MORUAŠ IH NI PITATI IZ DI SU DOŠLI.

HOJ HOJ HOJ HOJ, HOJ HOJ HOJ HOJ

MA VIE VUOGA ČA SI I TI POPIZDI I VIKATI POČA OD OVA 2 DANA SATIRANJA VUODE NA DOMU.

MA JIE NI NEGO TRENIRUN ZA U POBRATINI SE UČLUANITI, ČUJIN DA IH JE SVE TO MANJE PA JE GRIHOTA DA OBIČAJI PROPADU.

E A DA JE TAMO DVUA PRAJCA OKRIENUTI I 100L VINA DONITI ZAČAS BI NAS JOPE PUN BRATSKI DVUOR BI.
E A SI ČU DA VUAJ NUAŠ LIPOTAN NE SVIRA SAMO VU TAMBURU NA PLEĆIMI NEGO I PO KLAVIRU TUČIE PA JE LJUDIMI OČI ZAMAZA I KUPI KLAVIR TOBOŽE ZA DICU NA RAČUN OPĆINE, A JEDINI UN ZNUA TO STISKATI, MA DA JE
MAKUAR NEKI TEČAJ DICI DUA.

E A NUADUN SE DA BI MOGA KIKOLI TEČAJ ZUATO UČINITI, SAMO DA NE STAVI TEČAJ ZA TRUBU, ČU SA DA MU TO NAJBOLJE GRIE OD SVUOGA POSLA I
TALENTOV ČA IMA.

NE SEKIRAJ SE NINDŽE SU SVE POKUPILE SA JE PUO SELA U KRIZI PA ZNUANJE ZA TRUBU ČUVA SAMO ZUASE.

E ČU SA DA JE TA KRIZA OPIZDILA JOŠ JEDNOGA MJEŠTANINA PA JE TOLIKO POPIZDI DA MU JE PUN K ŽIVOTA DOŠLO I LEGA JE VUOME NAŠEMU LIPOTANU NA HAUBU I NIKAKO GA SE RIŠITI, LIPI JE KRIENU I VUAJ MU JE POTALAGUA IZ HAUBE OVO ISPRI DUĆANA.

E A POSLI KA JE SEBI DOŠA NI SE SIĆUA ČA JE NA HAUBI ČINI PA NA JE VOGA NAŠEGA KRNEVALINU I U NOVINE DUA I OPTUŽI ZA POKUŠAJ UBOJSTVA.

A ČUDA U VIN NAŠIN SELU, NEGO POVONJAJ TI VO.

ČA, ČA OSITIŠ? LIPO MI VONJA KA SU SE SVI OPRALI I NAVONJALI NAKON 2 DANA PRČIJE OVO PO DOMU.

E PA O TUOME TI I GOVORIN VU GODINU JE VODIE U NEDILJU, A ČA SE NE SIĆAŠ PROŠLE GODINE, MAJKO MILA NISI O SMRADA NA DOM MOGA DUOJTI ČA JE VODIE NESTALO PA SU SVI SMRDLJIVI NA DOM DOLAZILI.

MAJKO MOJA KAKO SMO SE ZAĆAKULALI ZABURAVILII SMO I ZUAČ SMO OVO, MORUAMO VOGA LIPOTANA OSUDITI, PROŠLE GODINE JE DOĆUNFA DA BI GA MOGLI OSUDITI VU GODINU PA JE POBIGA U INOZEMSTVO NA MISEC DAN, NI TRUAGA NI GLUASA.

E A KA SE SITIN PUSTE MUKE DOK SMO GA PONOVO ĆAPALI I OVO DOVELI, ALI MOĆA GA MI UNDA OSUDITI I NAŽGATI DOKLE NA JOPE POBIGA NI.
PUČE KUALJSKI JELI KRIV? OĆEMO GA NAŽGATI?

KRIV JE ČA JE DEFILE POSTUA PRIVATNA PRČIJA KRIV JE ČA JE GRDOVIĆ SLETI U VRTA
KRIV JE ČA JE I NUAŠ ČOVIK POŠA ZA NJIN KRIV JE ČA NEMA TUNUARE
KRIV JE ČA SMO ROBU OD MRIŽ POČALI ČINITI KRIV JE ČA SU NA SKUPILI LJEKOVITO BILJE
KRIV JE ČA U KAFIĆU ENGLESKI GOVORITI MORUAMO KRIV JE ČA TRADICIJA PROPADA
KRIV JE ČA RUŠI LJUDI PO SELU
KRIV JE ČA SE PUT PU PRIJEKA PROSIDA
KRIV JE ČA IZ ARTINE DO DOMA PREKO MULA MORUAŠ KRIV JE ČA JE CENMAR IZGORI
KRIV JE ČA ČISTUAČ NE VOZI PO SELU
KRIV JE ČA NA LJUDI U DANSKU BIŽU KRIV JE ČA JE VELIKA INFLACIJA
KRIV JE ČA NAN STRANCI PLJAČKAJU SELO KRIV JE ČA NAN SE DOM RASPADA
KRIV JE ČA MORUAMO PIŠATI U PLASTIČNI KUNDOTI KRIV JE ČA NA JE BEND SINOĆ KRUATKO PIVA
KRIV JE ČA HANGAR U LAMJANI PROPUŠIVA
KRIV JE ČA RIBARSKH BRODOV VIŠE NI NA BATALAŽI I MULU KRIV JE ČA RIBARNICA NA BATALAŽI ZJUAPI PRUAZNA
KRIV JE ČA SE NIŠTA NOVOGA U SELU NE RUADI
KRIV JE ČA NEMUOGU AUTUN NIZ CRIKVU PUDOLI KRIV JE ČA JE POTRES BI
KRIV JE ČA JE SINOĆ BI PUN DOM FUREŠTIH KRIV JE ČA SE TARACA RASPADA NA DOMU

NAŠI LJUDI DOBRIE VOLJE, DOGODINE BIĆE BOLJE!!!!!! NAŽGI GAAAAA, NAŽGIII!!