"Tastamenat štu vicijuoži veseljuaci kimin ni dlake na jaziku. Za do kraja razumiti i doživiti kualjske puoklade tribe biti Kualjanin oli barmuku živiti u Kalih jerbo je tastamenat nuaš, domaći, pun govora po Tadijinu." (iz Kualjskoga lumina – izdanje: Uskrs 1993.)

PUČE KUALJSKI DOBAR DAN!

MA KAKO VAS JE SAMO LIPO VITI SVIH NA BROJU,VAKO JEDAN DO DRUGOGA, BEZ BRNJIC, NAPOKON JE VA KORUONA IZGOTOVILA. KAKO SI TI AMIGO VU KORUONU PROSKUCA?

A ČA DA TI REČIN... PO CIJELI DANI PO INTRUADI...

AHA... PA SI LI DOBRO POŠKROPI MUASLINE,ČU SA DA ĆE VO BITI SUŠNA GODINA?

A NISA TI JUA O MUASLIN, VIŠE OD OVUOGA “LJEKOVITOGA BILJA”.. NEGO KA VEĆ PITAŠ, KAKO SU TEBE MUASLINE PLUATILE?

MA SLABO I NIKAKO AMIGO, UŽUA SA ISKATI JE LI KI NUODE PO MULU IMA KU LATU VIŠKA, A SAD NISA NAPUNI NI OVO ČA SA SOBUN PONI.

AJME, AJME A SI LI TI ČU ZA OVUOGA NAŠEGA ČA JE HODI OD SELA DO SELA, OD ULJARICE DO ULJARICE A NE ZNA DI SU GA MANJE PLUATILE. MORA DA SU NJEGOVE POSEBNE...
TUAJ JE VIŠE LITAR NAFTE SKURI NEGO ČA JE ULJA DOBI.. JOŠ MALO PA ĆE LITRA NAFTE BITI VIŠE NEGO LITRA ULJA.

ČA ĆEŠ MI JOŠ PRAVITI,CIJELI SI MI POKISA O KA SA NAFTU SPOMIJENU?

A ČA DA TI REČIN POBRATINE, MUKA MI JE OVIH NAŠIH RIBAROV. PUSTIH VAGUNOV SU ĆAPALI A NE MORU TU NAFTU POKRITI.

VIŠ KAKO SU SE NEKI ŠKAPULALI PA SU BRODI U ŠKRAPING DUALI. VIDILI SU DA JE VRAG PONI ŠUALU I DA TUOTE VIŠE NEMA KRUHA..BITI ĆE TUOGA JOŠ MENI SE ČINI.

(DOBRA VEČER EDEN GOLEM LEB)

MA ČA TO GOVORIŠ? ČA SI IZVITRI?

NISAN JUA IZVITRI NEGO TE UČIN KAKO ĆEŠ UBUDUĆE PO KRUH HODITI. VIDIŠ DA NAŠI KUALJANI NE ZNAJU KUALJSKI KRUH ISPEĆI, PA SMO MORALI ZVATI ŠKOLOVANOGA MAKEDONCA, A SE NJEMU OMILILO PA JE I ŽENI MESTO UČINI.

KAKO MISLIŠ DA JOJ JE MESTO UČINI?

LIPO BOGATI, BAR NAŠI LJUDI NI TIJEŠKO ZAKINUTI. A KI ĆE KUOGA NEGO SVUOJ SVUOGA! NOVI DIREKTOR NOVI LJUDI.
UKRAJINKE SU U BARIMI, FILIPINCI NA BRODIMI A MAKEDONCI U PEKARI.. A ČA NA TEK DOLAZI..

EA ZA SVAKI KURAC DANUAS ŠKUOLA TREBA, VIŠE NIJEŠ MOĆI NI NA RIBE PUOJTI BEZ ŠKUOLE. E ALI KO ĆEŠ BITI DIREKTOR ZA TO TI NIŠĆE NI TRIBE, NIJANKA NATJEČAJ..

A SI ČU KAKO SE U OVUOJ NAŠOJ LIPOJ FIRMI POSUA DIREKTORA DOBIVA?

NISA ČU, PRAVI MI?

A JEDAN NUAŠ ČOVIK SE VOZI PO SELU KO I INAČE,NIŠĆE NI RUADI I DOŠA JE VUODE IZA NUAS U VU NAŠU LIPU ZGRADU (SAMO ČA SE NE SRUŠI) PA SU MU REKLI DA SU DIREKTORICU PASI NA ARTINI IZGRIZLI I PITALI GA OĆE LI UN SA NA NJIEZINO MESTO STATI.

A ZA SRCE.. MA ČA SU MU MALO OVE PUSTE TITULE ČA IMA PA JE SA JOŠ I DIREKTOR POSTUA?

MA KIJE TITULE?

A VATROGASAC, ELEKTRIČAR, VODUAR.. NE ZNUN VIŠE NI NABROJITI.

NI TUOGA BRIGE ČA JE NAFTA POSKUPILA KA SE MUHTO VOZI, A DOBRO, NEKA MU JE SA SRIĆUN. A BOGAMI NAČINILI SU ONI DOBAR POSUA OVO ZUADNJE VRIME. SI VIDI? MOREŠ SE LIPO NAŠULJATI BEZ STRUAHA DA ĆEŠ U DUOCU U PROVALIJU PUASTI!
DA JESAN LI VIDI! BI SAN ĐIR NEKI DAN NAČINITI PA SA BAŠ GLJEDA..TIP TOP, NEMA ČUA. NUODE DI JE NUAJVISOČIJE NI NE TREBA! A SA KA SI VEĆ SPOMIJENU DA SU POSLA NAČINILI NEKA TI ISPRIČUN ČA MI SE DOGODILO KA SA HODI ONU NARANDŽASTU KANTU SKUPITI DOLI U BATALAŽU..

A ČA SE TUOTE IMA PRIČATI? DUOJDEŠ I POKUPIŠ.

IMA IMA SLUŠAJ VO... DOŠA JUA U PRVI DAN DOLI... ZATVORENO. DOŠA JUA SUTRA DAN JOPE NIKOGA NEMA, NIŠĆE MI NI BILO JASNO PA SA PITUA NUODE LJUDI PO BATALAŽI ČA DOGUAĐA... A NO MI GOVORU DA MORUN BITI SRIĆE DA GA NUAJDIN TUOTE. A SRCA TI, ČA ĆU SAD? NIŠĆE POŠA JUA DOMA GOVORIN SVOJIMI DA GA JOPE NISA NAŠA. A NO MI GOVORU DA SU ČULI DA UN KUARTE DIKOLI IGRA, DA MU SE DUOLI NE SIDI. ČUDA!
A UNDA SA POSLI PUAR DAN ČU DA GA NI BILO JER JE MORUA ČIPIRATI JEDNU PO JEDNU. DA SE VIDI NUAČ NUARUOD ŠUOLDI TROŠI.

A SVAŠTA ĆU JOŠ DANUAS ČUTI. DA NAN OVA FIRMA NI TOLIKO ZAUZETA BILI BI ONI TO ZAČAS PODILI.
VU GODINU SU STALI I SMEĆE PO SELU KUPITI, PA SE SA KUPI JEDAN PU SEDMIČNO, A JUA MISLIN DA NI POTRIBA NEGO JEDAN PU MISEČNO, ČA ĆE TI VIŠE.
NEGO KAKO NAN JE TA BIVŠA DIREKTORICA, KAKO SU JE TO PASI NAPALI?

A NE ZNUN TI JUA TO NISA TAMO BI, ALI PREMA ISKAZU JEDNIJE NAŠE ODGOVORNE MJEŠTANKE TO DA JE ČUDO BILO!!! DA SU JE TI PASI 5-6 STOTIN METRI VUKLI...

MA KAKO SE ONA SVUDER NUAJDE, MA JE LI TO ONA ČA SAMO U TUJI PIJUAT GLJEDA?

SVAKA NJUOJ ČUAST, SVUDER NA NUOS ZABIJA, ALI ISTO JUA MISLIN DA NI ONA TO SVE SUAMA MOGLA ZNATI. JE LI JOJ KI TUOTE POMOGA? ČA TI MISLIŠ?.

A TO TI JE ONA JEDNA DIREKTORICA U SELU ČA SE NE MINJA, GODINAMI JEDNA TE ISTA, MORA DA SE I NJUOJ MLADOST ZAMIRILA. BIĆE NJUOJ KRIVO BILO KA JE VIDILA KOLIKO LJUDI JE BILO OVO LETO NA STREETBALL-U. TO VA JE LJUDI BI ČOVIK NA ČOVIKU, OKRIJENUTI SE NISI MOGA. KO ČA JE I VUOJ PRVOJ SMIJETALA GLAZBA OD STREETBALLA. ALI DOBRO ZA RAZUMITI JE, GRUBO JE KA TI JE OMA KRAJ KUĆE. TAKO SU SE VALJA NJIH DVI TRIJEVILE NA PUTU I DOGOVORILE DA ĆE JEDNA TUŽITI OMLADINU A VA DRUGA DA ĆE JOJ SVJEDOK BITI.

TA MLADOST STVARNO NEMA SRIĆE. SAD DA ĆE IN VUODE DOLI U “NJIHOVOJ” PROSTORIJI GALERIJU NAČINITI.

GALERIJU? PA DI ĆE UNDA OMLADINA SA PUSTIMI STVUARIMI?

E DOBRO PITANJE. MORATI ĆE JOPE MOLITI I KUMITI DA IN KU KOLI SOBICU DUADU. A ČA SE TIČE TIJE GALERIJE NEKA MOLU BOGA DA IN SE PLAFON SE SRUŠI NA GLAVU.
OLI PLAFON NI U ŠESTU U DOMU? PA ČA SE NIKO NI SITI NAPRAVITI NEKI PROJEKT DA SE TA SALA RENOVIRA ILI ČAKOLI NAČINI PO TIN PITANJU??

MA BI JE JEDAN PROJEKT ALI ĆU TI TO PRAVITI POSLI KA BUDEMO GOVORITI O OVUOME NAŠEMU KRNEVUALU ILI BOLJE REĆI KRNEVUALIMI KA IMA DVUA LICA.

DA JE TO PRIVATNIK NAČINJUA ZAČAS BI SE TO IZGOTOVILO KO NA PRIMJER ONUAJ RESTORAN... VITI ĆEŠ KAKO ĆE TUOTE HOTEL IZNIKNUTI, BRŽE NEGO ONO NAŠE LJEKOVITO BILJE.
TAKO TI TO GRIJE U NAŠIN SELU... DI KI KOLI IMA DOBRU ZARADU, TO TI GRIJE FOR GAS. PA SI UNDA IMUA VO LETO ONUAJ BLUE FISH FESTIVAL…

EE ČU SA ZA TO, GOVORU LJUDI DA JE BILO PRVA LIGA. BIĆE BILE SVE SIMBOLIČNE CIJENE DA DOMUAĆI LJUDI MORU DUOJTI PROVATI MALO VRHUNSKE SPIZE?!

E MUOJ SINKO, DA JE BAR TAKO BILO... DA SI POŠA KO ONUOGA “NUSRETA” POJISTI ONUAJ ZLUATNI STEAK JEFTINIJE BI PROŠA..
CIJENE SU NENORMALNO U NEBO POŠLE KAKO NAFTE I ULJA, TAKO I KRUHA U DUĆANIMI I PIĆUA U KAFIĆIMI. KA IDIN U ONUAJ VELIKI DUĆAN U SUSJEDNO SELO I VIDIN RAČUN,SKORO MI SRCE STANE, A JOŠ GORE MI BUDE KA SE SITIN KOLIKO SU DINAMITA POTROŠILI KO NUAS ZA OVE NAŠE PLODINE, KOLIKU ĆE TEK NAMO CIJENU NABITI DA SE MALO POKRIJU, AJME, AJME!!

A NIŠĆE AMIGO, MORATI ĆEMO SVE VIŠE RIBE JISTI DA PEŽIVITI MOREMO. SAMO DI ĆEŠ JE NABAVITI KA JE VIH ZABRAN SVE VIŠE.

A ČA NISI ČU DA ĆE NAN SA OTVORITI RIBARNICU U BATALAŽI? PA ĆEMO TAMO ŠIMPRE HODITI.

MA ČU SAN SAMO ČA NIJEĆEŠ MOĆI OSITITI MIRIS LIPE FRIŠKE RIBE OD ONIH PUSTIH GOVUN. U JEDNUOJ VALI SE RIBA PRODUAJE A VAMO U DRUGOJ TIRAJU RIBARI ĆA.

MA NEMA STRUAHA IMAMO MI MLUADOGA NADOBUDNOGA NAČELNIKA I DOBRI LJUDI U VIJEĆU UZ NJEGA, KI ĆE SE ZA SVE TO POBRINUTI.

A BOJSE MU JE ISTO KA MU OVI DVUA NAŠA STUARA NE DUADU MIRA.

MA KI DVUA? SU TO OVI DVUA VUODE ISPRI NUAS?
A NI TI PUNO TREBALO DA POGODIŠ, JA KI LIPI SU!! NE ZNAŠ KI SE VIŠE NAGRABI. SVAŠTA SE TUOTE IZDOGUAĐALO, PA AJMO RIJEDUN.

OVUAJ NUAŠ CRVENI JE HODI OD KUĆE DO KUĆE DA VIDI S KIN ĆE KOALIRATI, JER VRAG MU NI DUA MIRA DA SE POVUČIJE KA JE IZGUBI PO 2. PUT ALI ,,, KI BROJI. NJEMU NE VRIDI ONA “NA MLAĐIMI SVIT OSTAJE”, NIJANKA NI MOGA ČEKATI DA ČOVIK ODRUADI SVUOJ MANDAT DO KRAJA, NEGO GA JE VEĆ PRVU GODINU POČE PRČITI. “MLADOSTI KUALJSKA ZAPITAJTE SE KI VAS VODI” U SVAKIN SLUČAJU BOLJE NA JE NEGO KA STE NAS VI VODILI. DOK JE VUAJ HODI PO KUĆAMI, VUAJ PLAVI JE JEDVA ČEKA KA ĆE NJEMU NA VRUATA POKUCATI.
I TAKO SE JE STVORILA JEDNA ZANIMLJIVA KUSIJERBA.
NEPRIJATELJ MUOGA NEPRIJATELJA JE MUOJ PRIJATELJ!
TAKOZVUANA PRIVREMENA KOALICIJA, ILI VAN U PRIJEVODU : DOČIN NJEGA SRUŠIMO SVAK SVOJIN PUTUN.

A SI LI ČU DA JE VUAJ CRVENI ISKUA POTENCIJALNI KANDIDUATI ZA VIJEĆE U LAMJANI DOK JE NA BOĆE IGRUA. EA KO SI HTI DOBITI ŠANSU ZA U VRH SELA MORUA SI PUŠTITI PARTIJU, TAKO TI TO GIJEDE.
A DOK SE VUAJ CRVENI TRUDI I BORI DA ČAKOLI USPIJE UČINITI, VUAJ PLAVI JE SIDI I RUADI, ZARAĐIVUA. VIŠU MANJU, POMALO VRIĆU NAPUNI, JEBIGA MORUAŠ IMATI DOBAR POČETNI KAPITUAL DA BI DOŠA VUODE GORI IZA NUAS U TIJEPLU FOTELJU.

EA TAKO VA TO GRIJEDE PUČE KUALJSKI.

MLUADI JE NAČELNIK IMUA DOBAR PLAN, SVE JE TO STAVI NA PAPIR, IZVUKA JE NEKI ŠUOLDI ZA PUAR DOBRIH STVUARI NAČINITI U SELU. SAMO JEBATI GA, SABOTIRALI SU GA OVI NAŠI LIPI LJUDI. I TAKO KA SE NEŠTO POČELO PLANIRATI I NAČINJATI ZA VO NAŠE MUALO SELO, SVE JE MORALO STATI.

A ZUAČ STATI?

A ZUATO ČA SU MU SRUŠILI PRORAČUN. I SA SU TI SVI RADOVI PO SELU DO DALJNJEGA ZAUSTAVLJENI, SA SMO LIPI. NIKAKO MI NA ZELENU GRUANU.

A ZNUN KAKOVI SMO KA NAN JE I DUGOGODIŠNJI PUOP ĆA POBIGA, I UN JE VIDI DA JE VUODE SVE KVRAGU POŠLO.

A JE LI KI DOŠA NAMISTO NJEGA? ČA SMO SAD BEZ POPA?

MA DOŠA JE NEKI TAMO IZ VLASI, JOŠ GA JUA NISA VIDI. KI ZNUA BIĆE NJEGA IŠĆE VA PANDURIJA ČA PATROLIRA VEĆ DANIMI PO SELU. DA OĆEŠ KOMAD BRODA KUPITI VIŠE TI GA NEMA KI NI KRSTITI A BOGAMI NEMAŠ GA DI NI DIGNUTI ZA ZIJERU KOPERA DATI, A KAMOLI DA GA NEDER VIJEŽEŠ.

KAKO NEMAŠ? IDEŠ U LAMJANU I LIPO TI GA DIZALICA DIGNE PUAR DAN NA KRUAJ, TO MALO NAMAŽEŠ I NUASE IS NJIN U MORE.

EEE POBRATINE NEMA TI VIŠE TIJE DIZALICE… ODEE... NEMAJU RIBARI VIŠE NIŠĆE U VIN SELU, NIJANKA FIJEŠTU.

MA NEMUOJ MI REĆI DA N RIBARSKIH NOĆI VIŠE NEMA?!

A IMA IMA ALI TO TI JE JAD I ŽALOST... DEFILE TI VIŠE NI ČA JE NEKAD BI, SAD MORUAŠ POZIVNICU NA KUĆU DOBITI AKO SE MISLIŠ NEDER UKRCATI.. JEDINO ČA NA JE OSTALO SU TI OVI NAŠI KUALJSKI BRUDETI. NABAVI SE ZIJERU RIBE, TO SE SKUHA I TO TI ŽIRI UNDA OCIJENI.

SAMO TUAJ ŽIRI VU GODINU NI ZNUA NI ČA SE SPRIJEMA NI ČA SU KUŠALI,JEDVA DA ZNUADU KUO VINO SU PILI, NAKO SU PO NUAVITU OCIJENILI I DOBRO JE, OBAVILI SU SVOJE. MALO SU POJILI, A ČA ĆEŠ, POSLI DOBRIJE RIBE SE GRIH VODIJE NAPITI.

A I JUA SA ŽUAĐAN SA, BIĆEŠ I TI AMIGO, BOGAMI SMO SE RASPRIČALI.
ČA MISLIS JE LI VRIME DA MI OVUOGA NAŠEGA KRNEVUALA OSUDIMO? ILI OVI NAŠI KAKO VAN JE DRAŽE.

A NEGO ČA JE.....
PUČE KUALJSKI, JE LI KRIV????

KRIV JE ČA SE SRUŠI PRORAČUN
KRIV JE ČA JE DOŠA EURO
KRIV JE ČA OVA ZGRADA IZA NUAS JOŠ NI SRIJEĐENA
KRIV JE ČA PASI NAPADAJU LJUDI PO SELU
KRIV JE ČA NE ŠKOLOVANI LJUDI DOBIVAJU VISOKE POZICIJE U SELU
KRIV JE ČA SU CIJENE NARIJESLE
KRIV JE ČA SE SMEĆE KUPI JEDAN PU SEDMIČNO
KRIV JE ČA JE MLADOST NA SUD DOSPILA
KRIV JE ČA SU SE STRANKE UDRUŽILE
KRIV JE ČA SU MUASLINE MALO PLUATILE
I KRIV JE ZA SVE ZLO U VIN SELU OVIH PROTEKLIH GODIN!

NAŽGIII GA NAŽGIIIIIIII!!!!!